"Empare-mi a faire solet"
Menar lu pichoi a l'autonomia es la técola promiera. La pedagogia serà centrada en l'enfant: la sieu personalitat, lo sieu desideri de crèisser, lu sieus besonhs. Lo travalh serà individualisat per fin de respectre lo ritme de cadun. Lo recors ai tècnicas e au material Montessori permete de menar l'enfant a mai d'autonomia en lo sieu travalh coma en la vida e de o responsabilisar. Lu pedagògues en l'escòla an una òptica de recerca per fin de melhorar lo material e li tècnicas per pus ben ajudar l'enfant a crèisser e per s'adaptar ai necessitats d'un ensenhament en lenga de Nissa.
Duberta sus l'exterior, la societat, lo mitan: li sortidas, diversi e regulari perméton d'introdure lu pichoi a la descuberta dau sieu mitan de vida, de non faire de l'escòla un monde claus.
Duberta sus un monde multilenga: lu mainaus son progressivament sensibilisats a la diversitat lenguística e curturala gràcias au niçard, palanca per li lengas latini en particular.
L'escòla non deu preparar au monde d'ancuèi, mas a-n aquèu de deman que serà lo monde d'adulte dai nòstres pichoi.
L'enfant es au centre de la pedagogia.
A lo poder de paraula, de decision, de responsabilitat. Es lo motor dai activitats.
L'escòla es per èu un luèc de vida dont s'organisa, gestiona, descuerbe, s'exprime.
L'escòla es un luèc de vida ai sieu dimensions.
15 pichoi per classa es un màximo per que cadun li sigue escotat.
A Calandreta, lu parents li particípon.
Lu parents son associats a la vida de l'escòla e de l'associacion que la fa viure.Intervènon en li activitats pedagògiqui en fonccion de li sieu competèncias e prepòstas. Lu parents son encoratjats a s'implicar en l'associacion per participar au project educatiu e a la vida de l'escòla.
Lo víncolo enfant-parents-ensenhaire es privilegiat, lo dialògue e la reflexion i son constants.